رسالة الى وزير

من الفلاح الصغير

الى البية الوزير

انتم حكومة ثورية

بعد الحكومة الحرامية

فلازم تحسوا بالمسؤولية

و تحسوا بالغلبان و الولية

مدمنين الفول و الطعمية

و برضك ما بتقضيش المهية

الاسعار بقت خرافية

و المهية هيه هيه

 

عشان كده لازم قرارات ثورية

ابعد عن الامور الروتينية

مش مطلوب منك تمشي الوزارة زي ما هى

مطلوب مع المواطنين الغلابة شوية حنية

دقنا الذل مع الحكومة المفترية

عشرين جنية للوريقة ديه

و ميه جنية للورقة دية

و خمسين جنية للست بهية

مطلوب حزم مع الناس المفترية

المرتشية

و العالم الحرامية

و نتعامل مع الدول الاجنبية

بندية

 

انا مش فاهم يعني اية اصول و خصوم

بس سمعت البنا بيقول

لازم نزرع زرع حصدة هيطول

فجنبه نزرع شوية بقول

شوية طماطم و جرجير و فول

من اللي بتحدص على طول

هي دي الاصول

الصراحة كلام معقول

لازم مشاريع استثمارية

نشوفها بعد سنين

و مشاريع نحس بيها الحسن

,,,

قول لوزير التموين

خلينا زي البرازيل و الارجنتين

الحد الادني للاكل بجنية و لا اتنين

رخص على قد ما تقدر ينوبك دعوتين

انما الرفاهية و المترفيهين

بفلوسك مش بفلوس دعم المحتاجين

فغلي انشاله الشيكولاته بعشرين

يعني وفر و رخص الاكل و البطاطين

و بنزين تمانين

و على الملاهي و السينما و الليموزين

غلى السجاير و الخمر اللعين

 

ممكن تقترح لنا على وزير الاثار

اننا نتفق مع متاحف العالم في كافة  الامصار

ياخذوا جزء من اثارنا ايجار مقابل كام مليار

و نذول الدخل بالاسترليني و الدولار

مش هنبيع من مصر مسمار

اللي يبيع من مصر شبر يبقي حمار

 

و انا عارف انك مصاحب حمدين

روح قل له رساله من الفلاحين المطحونين

روح قول له لو انت واحد مننا زين

و وطني و امين 

خليك للريس دراعة اليمين

مش يقول شمال تقول يمين

يقول يمين تقول لا يا متطرفين

يقول وسط تقول لا لاخونة الدين

هو التشتت ده هيودينا لفين

و مين هيدفع الفاتوره مين

غير الفلاحين

احنا الغلابة التعبنين

ما تجرش بعرقنا و دمنا

دمنا غالي و تمين

و اذا كنتوا مع الاسلامين مختلفين

و مفيش مجال تبقوا متعاونين

ليكوا فكر تاني و متعارضين

ابدأ مشروعك القومي و وري حاجة حلوه للعين

و متوقفش الميدادين