كوكتيل مشاعر مضروبة في خلاط

كوكتيل مشاعر مضروبة في خلاط

حب و كرة و فرح و عياط

يا حنينة على كل الضباط

حتى امن الدولة و ضباط الاحتياط

شوية حنية على اولادك المرمين على البلاط

يا لي حفظتيني تبت يدا ابي لهب

و اكررها وراكي قبل ما انام

سورة تبت مش حدوتة عشان انام

دي سورة عظيمة عن خطورة الاعلام

اللي بيحول الناس لاغنام

و اعداء لسيد الانام

يا ام دنيا

بصي على الدنيا

الدنيا بتتقدم

 و حنا اولادك كل يوم بنتيتم

و هو التخلف علينا متحتم

في صندوق اسود متختم

و قسمنا نفسنا فريقين

و نفرح لما يموت لنا اخ من الفريق التاني

ده لو امريكي او الماني

ليه تفرح يا جدع ؟؟

مش انسان ده ؟؟ و لا جنس تاني ؟؟

ليبرالي او اخواني

او سلفي او اي تيار تاني

نقعد مع بعض يا جدع

و نتفق نبني مصر من تاني

يا ام هبه

هبه قاعدة على النيل

بتغني ويايا مواويل

نغني لعبدالله الشريف

و الحاج امين

و الشيخ امام

بنغني في وسط النخيل

 و عيني في عنيها الكحيل

و شعرها الطويل

تسئلني : ازاي عرفنا نصالح اسرائيل

و نضحي عشان الطريق طويل

و احنا اولاد اسماعيل

كل اللي بينا تار و عويل

و اتهامات , انت خائن و عميل

و هاجمنا الفقي و زويل

و هم مسحراتية

عملوا المستحيل

عشان يصحونا من الحلم الجميل

فوقوا يا مساطيل

و اعملوا المستحيل

ارفعوا رايتكم جيل ورا جيل

لكن تقول لمين ؟؟

و منين تجيب ناس لمعناه الكلام فهمين

و عارفين

اننا في الاصل أخين

و ان الخلاف ليوم الدين

لا الشمس هتكون قمر

و نشوف في الصبح شمسين

و لا  هنشوف في الليل قمرين

بس متفاهمين و منظمين

و الطير

علشان يطير يلزمة جناحين

لازم واحد شمال و التاني يمين

لا ينفع الاتنين شمالين

 و لا الاتنين يمينين

و سيدنا ابو بكر و عمر

العمرين

ساعات تلاقيهم مختلفين

واحد فيه لين

و التاني شديد حبتين

و في الاول و في الاخر

اخين متحابين

فاهم ان التاني

هدفه الخير من طريق تاني

اه يا بلد

عايزة ولد

يبات معاكي ليلة

و تصبحي ارملة

و تلبسي السواد

و تقيمي الحداد

يا ريتك قتلتيه من سكات

و اللي داس على الورود

في محمد محمود

بقوا هم الشهود

و في الاربعين

موجودين

و متصدرين

و مكرمين

و ده يرضي مين ؟؟

حبه راضين و فرحانين

و حبه زعلانين و مقهورين

هو مكتوب على الجبين ؟؟

نفضل مختلفين ؟؟؟

متخلفين ؟؟؟

سبنا القلم و الكراسة

و قلنا نصلح السياسة

اتاري السياسة

مش بدلة و حراسة

و لا خطب و حماسة

دي جثه متفحمه في رابعة و كرداسة

يتصور فوقيها بكل مياصة

اخ لينا ماسك قناصة

فرحان بجثة اخوة

تحت رجله صادها برصاصة

جثة مش متكفنه بعلم

هي اصلا علم

احمر لون الدم

ابيض لون الكفن يا عم

اسود لانها اتحرقت فحم

خد رأ س اخوك معاك البيت

و نزل صورتكم من على الحيط

و علق رأس أخوك تذكار

اخوك اللي كان فاكر سيفه سيفك

اكتشف لما فجرته برصاصتك

اكتشف زيفك

مات زعلان عليك

دانا اخوك

كنت وقت الشدة سندك

 سامحني لو وقت الشدة ملقتنيش جنبك

سامحني غصب عني

لو عايز تلومني

تعال على قبري

تعال وزرني

و لمنى زي مانت عايز

حقك عليا

بس ياخويا زرني

انت اخويا و امك هي امي

ام الدنيا

و بيتها مفتوح لاولادها

عمرها يوم ما اقفلت بابها

 دون احفادها

يمكن معذورة اليومين دول

بابها مقفول على ناس و ناس

و على الباب ترباس

نفسي اقولها بحبك

بس بيني و بينها  حراس

حالفين يعملوا خدي مداس

ينداس

لانجس الانجاس

سمعوا اني نتن

مبستحماش!!

غصب عني

المية فين ؟؟؟

الماية مقطوعة و احنا بلاد النيل

و الكهربا مقطوعة و الكبريهات شغالة طول الليل

و عماويد النور شغالة بالنهار و مقطوعة بالليل

استحمي بأيه ؟؟

و بفرض اني ما استحماشي

تقوم بالرصاص لبندقيتك حاشي

و تضرب اخوك!!  ده الجيش الفاشي

رغم كل اللي عمله , عمره معملهاشي

خليك ورا كلامه .. ماشي

و انا ماشي

راجع لمدرستنا القديمة

هاقف في طابور العلم

واقف حيران بألم

ربنا واحد

و العلم واحد

و الوجه واحد

و الدم واحد

و اللسان واحد

و تاريخنا واحد

اية اللي خلى دمي حلال

تقتل و تنام مرتاح البال

اية اللي غير الحال

و خلاك تسمع كلام واحد حاقد ؟؟؟