الى قطر

حلم العديد من الشباب الهجرة و العمل في الدول العربية

لم يكن هذا حلمي لارتباطي بالعائلة لانى وحيد ابويا

لكن نظرا لظروف البلد (على كف عفريت)

بتهيألي لو حد كان اغمي عليه يوم 24 يناير 2011 و صحي اليومين دول في شهر يوليو  2013-

محتاجين خمسين سنه عشان نفهمه

ده لو كنا احنا فاهمين !!!!!

المهم نتيجة لظروف البلد قررت اسافر اشتغل في دوله تكون مهتمة بالمباني الخضراء حتى اخذ خبره فيها



ارسلت لقطر و السعودية و الامارات

كل اصحابي ضحكوا عليا : علم اية اللي انت عاوز تخده اللي اتعلم اتعلم من زمان , تسافر عشان تبني نفسك

طيب بداية : ابعت السي في لكل الشركات (حتى لو كانت ملهاش علاقة بأي حاجة )

اخذت ابحث عن ايميلات الشركات على جوجل ابحث عن الشركات الاستشارية و المقاولات و ادخل على الموقع و ارسل للايميل الموجود

لو فيه شركة طالبه مهندس انشائي خبرة 10 سنين في زيمباوي بابعت السي في ما ببلاش و مش خسران حاجه

بالاضافة لمحادثة اصحبي اللي مسافرين , (المعارف بتنفع برضك لو مكانوش اندال )

بالاضافة انى موقعي مهاويس البيم بيجيلي منه فرص عمل كويسة

و انا في الشغل

جالى مكالمه من رقم دولي

بعدت عن الناس عشان الحسد

الو

كلام انجليزي

المهم وقفت في مكان هادي (في الشمس المصرية التى كنت ظالمها و فاكرها ساخنه ) و اخذت اتحدث مع المتصل

اللهجة لم تكن انجليزية خالصه

بل يشوبها لكنه اسيويه (عرفت انها فلبينيه)

حسنا سئلت شوية اسئلة و تعرفت على الشركة و ظروف العمل

جميل كويس

لكن طلبت ارسال رساله بما اتفقنا عليه

مش ممكن يكون الانجليزي مهئ لي حاجات ,  لما تكون مكتوبة ممكن نسئل حبيبنا جوجل ترانسليت

اتصل بصديق لي كان يعمل في قطر و استشرته

فوضح لي حاجات مهمة استفدت منها و هاقولكم عليها في القصة

مهم جدا تسئل واحد ما يكنش مضايق منك و عايز ينتقم(و دول كثير)

بعد الاستخارة و الاستشاره

جائت التأشيرة (مهم جدا الا تقدم استقالتك الا بعد الحصول على التأشيرة ما تبعش سمك في مايه )

حسنا التأشيرة في يدي و الاستقاله في اليد الاخري

تردد كبير لانها اول مره اخذ خطوة في ترك بلدي

لو توقفت و انتظرت ساعات لم اكن لأسافر

لذلك استشرت رئيسي المباشر فقال لي في هذه الظروف اقول لك اتقل على الله

دخلت للمهندسة رئيسة القسم

و قدمت الاستقاله

خرجت بعد ثواني لاجد الشركه كلها عرفت ربنا يسامحك ياللي في بالي

بدأت في تجهيزاوراقي للسفر و كأنت رحله عذاب و  تشتت لذلك مهم تتصل و تسئل الذين سبقوك

كانت اصعب لحظة هي لحظة الفراق و ترك الاهل

ركبت السيارة مع والدي المهندس عبدالله و مع زوج اختى ايمن مدبولي

(احاول الا اتكلم كثيرا لانى كنت اخاف ان افتح فمي فاقول لهم لف و ارجع تاني )

اذهب الى صالة ثلاثة و اودع والدي



و ادخل الى الشباك

احاول تغير الفلوس الى ريالات قطري لم اجد

الصح اني احول لدولارات

لكن قلت لعلي اجد شباك اخر فيه تحويل لقطري

اتمشي حتى ميعاد الطيارة بعد  ساعة

ادخل الى صالله انتظار الطائرة فيذمر الجهاز لوجود الموبايل

يسئل الامن ماذا في جيبك فاجيبه الموبايل و فلوس

فيقول ممنوع تخرج بفلوس من البلد

هو انا مخرج مليون جنية

دي فلوس اكل منها لحد ما اقبض و لم اعرف بهذا القانون

فيسئلني هل سافرت قبل هذا ؟

و ينظر الى الباسبور فيجده فارغ

فيقول لي خلاص عدي المره دي لانها اول مره و الا كنا صادرنا الفلوس

فنصيحة لو معك فلوس حطها في شنطة اليد او شنطة الاب توب التى ستصعد بها الطائرة

نركب سيارة تحملنا الى الطائرة

نركب الطائة و تبدا التنبيهات

لو الطائرة وقعت اعمل كده

و لو ولعت تعمل اية

ليه بس كده من اولها

كان مكاني في المنتصف



و لما وجدت الطائرة اوشكت على التحرك و في اماكن كثيرة فارغة استئذنت و انتقلت الى مقعد بجوار الشباك

منظر رائع و جميل

مفروض اقول كده زي كل الناس بس كنت مضايق من منظر الصحراء طول الطريق

ليه ما نعمرهاش معندناش كام واحد سمبل يعمروا الصحرا !!!

بعد ثلاث ساعات و ربع و صلنا مطار الدوحة

قمت فاتح الموبايل و اتصلت بامي اطمنهاعلي

طبعا الرصيد صفر



السلم كان مغطي حماية من الشمس

ركبنا سيارة الى صاله المطار وقفت في الطابور

كان فيه نظام امنى تنظر فيه بعينك

الحمد لله عديت منه رغم اني ما ابشوفش

لا مش اختبار نظر

ده لو ليك سجل او ممنوع من دخول البلد يقوم بكشفك

دخلت و اخذت شنطتي

و رحت على الجمارك و التفتيش

كان هناك من اخبرني ان اصبر و سيتم تفتيشي تفتيش دقيق حتى خلع الشراب

يا ساتر لو كلنا خلعنا الشرابات ده الناس هيغمي عليها

الحمد لله لم يفتح احد اي شنطة او افتش و لم يقل لي احد غير حمدا لله على سلامتك

(كان في الشنطة شوية ادوية برد و مضاد حيوي لان على ما اسمع ان صرف الادوية في قطر لازم روشته , لحد الان لم اخذ اي شئ و الحمد لله , بفكر اسف اي حاجة استخسار )

خرجت فوجدت شخص من طرف الشركة معه ورقة عليها اسمي بالانجليزي

اشرت اليه و خرجنا من الصاله المكثفة , اول ما فتحت الباب وجدت نفسي مش شايف لان الرطوبة عملت شابوره على النضارة من اول ثانية

تعرفت على السائق و خرجنا مع بعض اسمه محمد من بنجلاديش

سرنا قليلا ثم استئن لاحضار السيارة و فضلت شوية في الحر



بعد قصة طويله

ذهبت للمسجد لاصلي

و ذهبت الى مصرف لاحول النقدية

وجدت ان التحويل ساخسر فيه فحولت 200 جنية الى 94 ريال قطري

ذهبت الى الفندق  فندق سوفرين و ميزته انه قريب جدا من الشركة

دقائق مشي

و حجزت شهر كامل

الشهر ارخص بكثير من البقاء اسبوع او كام يوم

اليوم ممكن يقف ب350 ريال قطري انما الشهر ب 4000 ريال قطري

الاستديو و هو عباره عن غرفة بحمام ب 3000 ريال قطري

الشقة ب 5000 ريال قطري

ارقام تقريبيه قد تكون اعلى او اقل حسب المكان

اغلي حاجة السكن خلي بالك و انت بتتفق لان ناس اتفقت بدون علم و اكتشفت ان المرتب بيروح في السكن و المواصلات و الاكل



اول ما دخلت الغرفة في الفندق

لازم اكلم الاهل

شغل اللاب تووب

اه الوايرليس عليه باسورد

اتصلت بخدمة الفندق  قلت له اعطني الباسورد

فقال لي : "                 "

كلام بالانجليزي مش فاهم منه كثير (احسن حاجة اني لحد الان لم اقبل حد انجليزي انجليزي فمن حقي اني ارمي التهمة عليه و اقول ان العيب عنده , شغل مصريين) المهم كتبت الباسورد بالفهلوه و اشتغل

شغلت برنامج الاسكايب افضل برنامج للمغتربين (خلاص اخذت اللقب رسمي )

http://www.skype.com/ar/

و لاضافة الصوت و الفيديو الى دردشة الجيميل . حتى تكون الدردشة اون لاين

http://www.google.com/chat/voice/

يادوبك كلمتهم و اطمنوا عليا

و رحت نايم بهدومي من التعب لم استطع ان اغيرها

كل ما افتح عيني اجد النور في الشباك هو المغرب لسة ما ادنش ؟؟؟

فين و فين على ما اكتشقت ان فيه لمبه امام الشباك و ان المغرب ادن من ساعة

قمت صليت المغرب و فطرت جبنه و بلح من اللي امي حطتهم لي في الشنطة

و نزلت اتمشيت شوية و رحت المسجد الكبير صليت فيه العشاء

و اشتريت كارت فودافون بخمسة و عشرين ريال

رجعت البيت عشان اتصل باصحابي لاكتشف ان هذا سعر الكارت و ليس فيه رصيد

فيه كروت بتكون فيها رصيد بس بتكون اغلي

بالنسبة للاكل و الشرب

بص يا معلم اول ما دخلت السوبر ماركت

كيس الشيبسي بخمسة ريال

يعني بالمصري عشرة جنية

فاسيبها و اروح للي بعده

نفس الكلام

عشان تريح نفسك ما تحولش للمصري

خمسة ريال يعني خمسة متحولش للمصري خالص كانها خمسة جنية

برضك هتلاقي في حاجات غالية شوية

لان في مصر في دعم

بس لو رحت حاجة زي كنتاكي هتلاقي نفس الاسعار تقريبا

المطاعم احسن حاجة طبعا المصري

و السوري و اللبناني و التركي

لان اكلنا قريب من بعض فالمعدة مش هتتعب فكل و انت مغمض

و الافغاني جربته كثير لان مطعم بخاري قريب مني

و شكلي هادمنه

المطاعم الهندي احذر لانهم بيزودوا في الشطة و هم نفسهم بتعبوا من الاكل

لو عايز تطلب اطلب برياني لان الشطة بتكون بره

مفيش مشكلة تجرب حاجات جديدة بس ماتقفورش في اول مره

ادي فرصة للمعدة تتعرف عليها

حاليا بشرب لبن شراب بالتوابل الحارة (انتاج قطر)

و احسن حاجة ممكن تروح السوبر ماركت تاخذ تفاحة و موزتين و تدفع تمنهم

بفكر اغلس عليه و اقوله عايز تفاحة و نص , تفتكر هيرضى؟؟



للحديث بقية..............

دمتم بعافية