في قطر

قبل ما اسافر كنت بفكر اخد كورست انجليزي

اولاد الحلال قالو لي افضل كورس "نوت كورس"

ليه ؟؟ لانك بتقعد مع ناس ببتكلم انجليزي و تعيش كأنك هناك

لما سافرت قطر حسيت اني دخلت الكورس و ببلاش كمان



و كرس لذيذ بنهزر فيه و بنضحك

اغلب الحديث بالانجليزي


طبعا اول ما قابلت واحد مصري في الشركة فرحت جدا و قعدنا نتكلم بالعربي

اللي حوالين مش فاهمين عربي و دي ميزة نتكلم براحتنا هما مالهم احنا بنقول اية , دي حاجة غريبة قوي

بعد شوية ناس من دولة اسيوية اخدوا يتكلموا لغتهم

نظرت لهم بتعجب (مش يراعوا ان في ناس ما بتعرفش لغتهم و يتكلموا لغة مشتركة )

      نموذج للعقلية  التى تستحسن فعل الشئ اذا فعلته و تستنكره من غيرها

من المقالب التي اتعملت في الان و بالانجليزي

صديق هندي دخل و قال لي بالانجليزي

السماء تمطر الان

اية ؟؟ الان , حقا

قمت جري على الشباك لاري

فاجد الشمس حامية و السماء صافية , هو فيه ايه هى مطره جافة و الا اية

فقال لي ضاحكا :  انها تمطر الان في دبي

لا تعليق

انجلياربيهندي

بمناسبة الجو

الجو في قطر و عامة الخليج حر

بس يمكن في قطر بذات لا توجد ايام سقعة او باردة

فمحدش يضحك عليك و يقول لك خذ البالطو ده معاك او البطانية  و الكبرتاية

هتبقي شايل على الفاضي

خلي البس بنصف كم و لو من غير كم يبقى احسن

اغلب المصرين و اعلب اصدقائي اول ما بيروح البيت ما بيخرجش منه (التكييف يا ريس )

بحاول يوميا اخرج اتمشي و اشوف المنطقة

الدوحة هي دبي قبل خمس سنين

المدن العربية قبل و بعد

في مباني جميلة و مشاريع كثيرة بتتبني

اول جمعه لي في قطر قلت  اصلي في

مسجد ابو بكر الصديق

جامع كبير و تقريبا تاني جامع في قطر

و انتظر يمكن اقابل حد من اصدقائي المصريين

خرجت من الجامع فوجدت صديق مصري محمد عادل

هنفطر مع بعض

عدى علي بالعربية

و شرح لي وضع الحياة في قطر و رحنا فطرنا في مطعم جبال لبنان

كان ناقص ساعة الا ربع على الفطار

حجزنا و رحنا استنينا في المسجد

الى ان اذن المؤذن و قمنا كعادة المصريين لنصلي بعد ثواني من انتهاء الاذان

لكنه خرج قلنا هيتمضمض او ياكل بلحة و ييجي

مرت 5 دقائق و لا يوجد في المسجد الا شخص واحد يقرا القران

طب نصلي احنا و الا اياه

فنظر لنا لسه خمس دقائق

ايه ده هو مش في رمضان في استثناء (احنا بنشرب المياة و ناكل البلح قبل ما يخلص الله اكبر )

اول ما اقام الصلام و قفنا نصلي

اول ما سلمنا وجدنا الجامع مكتض بالمصليين

و هو اللي كان من دقيقة مفيش حد

رحنا فطرنا في المطعم و طلعنا على

VILLAGGO

مول كبير و فخم



لم اكن عارف اننا خارجين فسحه كنت لبست اللي على الحبل (حبل ايه بس , فوء)

ثم قال لي تعال نشرب كرك

الكرك هو مشروب هندي

منتشر في قطر و الامارات

و لازم اول ما تروح تشربه

عبارة عن شاي بلبن

اه زي مبقولك كده

و قعدنا شوية على الكورنيش نشاهد    أبراج الدوحة و نتحدث

اه

بالنسبة للسياسة

اللي كلنا طبعا متخرجين من كلية سياسة و علوم سياسية

من جامعة الزوربون

نصيحة اخوية

تجنب الحديث في السياسة ما استطعت

و ان كنت لن تستطيع

الناس كلها مش فاهمة اية الي بيحب في مصر  (لسه مقابل واحد هندي اول ماعرف اني مصري سئلني are you more c   or cc)

مصر

ام الدنيا

يكونش اكتشف اننا مش اولادها و اننا من اب تاني ؟؟

لا صعبه دي

يعني باقي الدول مفهوم اللي بيحصل هناك

حرب عرقية , جنسية , مهلبية

حاجة مفهومة

انما احنا

كالعادة ابهرنا العالم و وقف عاجز عن التصديق

بفكر عشان اريح دماغي اقول لهم

دي عادة فرعونية

عندنا كل خمسمائة عام بنحتفل كمصريين و نقسم نفسنا نصين , بنعمل قرعة

و بعد كدا بنقتل نفسنا

لو معملناش كده الكره الارضية بتفسي

فحنا بنضحي بأنفسنا كمصريين من اجل العالم

اية رأيكم ؟؟؟