للبيع
و انا ماشي بالعجوزة
شفت واحدة عجوزة
عند محكمة العجوزة
قاعدة بتبيع من الفقر و العوزة
اديني منديل يا حاجه
قالت المنديل ده غالي
و سعره عالي
و انا معيش فلوس
انا ببيع شئ رخيص
و مالوش قيمة عند الخسيس
ببيع دم الشهيد
ببيع دم ابني اللي كانت ضحكتة عيد
و كان مثقف زيك و رأيه سديد
مكنش له زي , كان فريد
و كان حنين على ابوه القعيد
ممكن يا فندي تقولي
ليه بيقولوا عليه شهيد
من الشهد و العسل يعني ؟؟
مستحيل !
ده ارخص من العسل الاسود
ارخص شئ في البلد
الي ماتوا مالهم عدد
و كل ميت عيلته في حزن و كمد
و كل اللي قتلوهم
قضائنا برائهم
و كل اللي دافعوا عنهم
و كل الي اتصابوا معاهم
و اختلط دمه بدمهم
قضائنا اعدمهم
او اشفق عليهم
و كهربهم
و القاضي شكله متعلم و فاهم
و انا جاهله مبعرفش افك الخط
بيقول مفيش حد مات
طب ابني فين فات
و جثته اللي حضنتها
و بدموعي غسلتها
و دفنتها
كانت جثته و لا دي كمان فوتوشوب
افتكرت كلامهم بجد
شكيت في عيني و صدقت اي حد
صدقت مذيع مجنون
قلت ادور عليه في السجون
لقيت مين مسجون ..
لقيت نبي
بن نبي
حفيد نبي
و لقيت الضابط يوسف صديق اللي شال فاروق
لقيته من حكم العسكر مخنوق
و لقيت مجاهد قتل محتل بلده
مسجون عشان يقعدوه على الخازوق
و لقيت جنبه ولي مشنوق
سليمان خاطر قلبي عليه محروق
قالي مش هيا ام الدينا
يعني وليه
يعني الدلتا فتحه السبعه
و صحرائها الشرقية و الغربية
صدرها
اتسجنت عشان دفعت عن عرضها
عن ارضها
يا ويللالي
و لقيت جنبه ولي
الشاذلي نوره جلي
قلت له احنا فين
قالي تايهين
هنا رمال كلها جلال
عذب عليها السيد بلال
و رقصت على جثمانه بكل دلال
بعد فتوي شيخنا بان الرقص فن حلال
هنا السحرة من المكرمين
من المقربين
فأن اسلموا برب العالمين
اصبحوا مسجونين
على جذع الشجره مصلوبين
الا كبيرهم ذراعية على فرعي النيل مصلوبين
دمياط و رشيد عن الشمال و عن اليمين
و لقيت شيخ عريض و طويل
بيقولوا اسمه ايو اسماعيل
بيقولوا خاين و عميل
لكن اشهد انه اسد جليل
كان بيدافع عن ابني القتيل
ايوة ببيع
انا من امبابة
يعني بوابة التحرير
و شوفت في يوم خلق كثير
بيطالبوا بالتطهير و التغيير
عيش حرية عدالة اجتماعية
هجموا عليهم الحمير
مش بشتم يا كبير
هجموا فعلا الجمال
و الحمير و البغال
و صمد الرجال
منهم اللي مات في الحال
و منهم اللي اتحكم يشنق بالاحبال
القصه انتهت يا بن الخال ؟؟
محال
سبحان مقلب الاحوال
من حال الي حال
لسه فصل تاني
يارب يكون احسن من الاولاني
و اوعوا في يوم تصدق اني هبيع دم الشهيد
لو حتي بعت الحديد
و حطوني في الحديد
دي حجه عشان افكر العبيد
انهم باعوا دم الشهيد
تعليقات
إرسال تعليق